us de Schwiiz...
... für d Schwiiz

Gschecht vom MUNK BRÄU


Bieridee

Agfange het aues met ere Bieridee. I de Sommerferie 2019 ben i uf de Suechi förne Bierhahne im Netz öber ne chlini kompletti Hobby-Brauerei gstoupered.

Läck geniau. Worom ned grad e ganzi Brauerei chaufe ond usefende, wie me es guets Bier ine Fläsche bechonnt?

Mini Frau het die Idee aber ned so cool gfonde, do i eh scho vöu Projekt am loufe ha ond Ziit emmer knapp esch.

Auso han i die Braualag hender ehrem Rögge kauft.

Ui ui ui.

Wie breng i ere das jetz nome no bi. Tja dodezue wemmer aber ned z’vöu verrote. Nome sovöu: es esch schliesslech guet usecho ond jetz het mini Frou 1000 Grönd, zom mini "nei das bruuche mer jetz ned ombedengt" z'omgoh:-)

Erschti Brautag

Före erschti Brautag han i zwöi Spezialeschte iglade, wo mer aues zeigt hend und me id Brau - Wäut igführt hend.

A dere Stöu: Merci vöu mou a öich zwöi ;-)

Die erschte paar Suds woni denn elei gmacht ha, send so geniau use cho, dass i scho zemlech schnäu e chlini Fan - Gmeinschaft gha ha. Das het mi motiviert, meh do drus z’mache. Zo mou ou mini Frou vom feine Bier begeisteret esch.

Erwiiterig

Ned mou eis Johr nachdäm i die Hobby - Braualag im Netz gsee ha (ond vom Bier mache no kei Ahnig gha ha), esch bereits e Erwiiterig vo minere Braualag i Gang cho. I ha denn weder mou bez im Internet omegluegt was es do so het. E kompletti Microbrauerei met doppuwandige ond isolierte Gärtänk inkl. Chüeualag. Jenschti Keg inkl. Reinigongsmaschene ond so wiiter. Das esch genau das, was i bruche.

Ond das mou hani natürlech (we sech das normalerwiis ou ghört), s'OK vo minere Frou ighout ond ou öbercho. Esch jo ou es bezeli e grössere Betrag gsi as be de erschte Alag.

Gschecht goht aso wiiter...